×

Azərbaycan Turizm Agentlikləri Assosiasiyası (ATAA) 2019-cu il mart ayının 28-də təsis edilib və iyun ayının 27- də geniş ictimaiyyətə təqdim olunub.


Assosiasiyanın əsas fəaliyyət istiqaməti Azərbaycanın turizm sənayesinin inkişafında aktiv iştirak etmək, dövlət-özəl sektor arasında effektiv əməkdaşlıq əlaqələrinin qurulmasına və genişləndirilməsinə nail olmaq, üzvlərin maraqlarının qorunmasını təmin etmək, eləcə də turizm məhsullarının yaradılmasına və xidmət keyfiyyətinin artırılmasına  dəstək olmaqdır.

Azərbaycan Turizm Agentlikləri Assosiasiyası ölkəyə daha çox turistin cəlb edilməsində önəmli tərəflərdən biri kimi milli turizm maraqlarından çıxış edərək, standartlara cavab verən, keyfiyyətli turizm xidmətləri göstərən və ölkə turizminin inkişafına önəm verən agentlikləri Assosiasiya ətrafında sıx birləşdirərək birgə fəaliyyət göstərməkdədir.

Hazırda Assosiasiyanın Azərbaycanın turizm bazarında öz fəaliyyəti, peşəkarlığı və vətəndaş məmnunluğunun təmin edilməsi baxımından seçilən 153 üzvü mövcuddur.

Azərbaycan Turizm Agentlikləri Assosiasiyası (ATAA) yarandığı gündən turizm sahəsində aktiv fəaliyyət göstərərək  Dövlət Turizm Agentliy, Azərbaycan Turizm Bürosu, Azərbaycan Hotellər Assosiasiyası, Azərbaycan Turizm Bələdçiləri Assosiasiyası, Azərbaycan Turizm Blogerləri Assosiasiyası, həmçinin Azərbaycan Hava Yolları, Türk Hava Yolları, “Air Astana”,”Air Arabia” və bir sıra digər hava yolları şirkəti, xarici ölkələrin Azərbaycandakı səfirlikləri,  turizm yönümlü təşkilatları ilə qarşılıqlı iş birliyinin  yaradılmasına müvəffəq olub.

Assosiasiya eyni zamanda ölkənin turizm potensialının marketinq və təşviqinin həyata keçirilməsində,turist cəlbediciliyinin artırılmasında Türkiyənin TURSAB, eləcə də Rusiyanın, Gürcüstanın, Səudiyyə Ərəbistanın, BƏƏ-nin, Qətərin  və digər Yaxın Şərq ölkələrinin  və Mərkəzi və Orta Asiya ölkələrinin turizm yönümlü təşkilatları ilə əməkdaşlıq əlaqələrini genişləndirməkdədir.

 ATAA BMT-nin Ümumdünya Turizm Təşkilatının assosiativ üzvüdür.